SINDANGBARANG.

SALA-SATOE tempat paling bagoes letaknya di pasisir Selatan dari Preaanger ada Sindangbarang, jang berbeda dari Pelaboean Ratoe, tida begitoe sering orang koendjoengken, boleh djadi karena letaknya ada sedikit djaoe.

Toch Sindangbarang bisa disampel dari banjak tempat :

Pertama dari Soekaboemi via Baros - Njalindoeng - Takokak dan Soekanagara.

Kadoea dari Soekaboemi via Tjireungas - Soekanegara.

Katiga dari Soekaboemi lewat Tjilakoe - Tjibeber - Soekanegara.

Ka'ampat dari Tjiandjoer melalui Soekanegara.

Kalima dari Bandoeng via Tjiwide - Rantjabali - Onderneming Koleberes.

Kaloe orang ambil djalan pertama jalah liwatin Baros dan Njalindoeng orang bermoela lintasin kebon-kebon onderneming jang kasi roepa-roepa pemandangan bagoes. Sampe Njalindoeng djalanan auto ada baek, tapi liwat Njalindoeng djalanan moelain koerang litjin.

Sampe Takokak orang bisa mampir di pasanggrahan baroe jang letaknya diblakang bale dessa. Sebabnya terletak di atas satoe boekit, dari ini pasanggrahan orang dapet pemandangan loeas di sakiternja, jalah atas oetan-oetan dengen poehoen-poehoen tinggi.

Ini tempat ada sanget soenji, hingga soeroep boeat orang jang soeka kasoenjian.

Kaloe orang naek ka poentjaknja tempat koeboeran Tionghoa di Soekaboemi (Tjikoendoer) orang dapet pemandangan jang rada-rada mirip dengen apa jang pasanggrahan Takokak soegoehken pada mata pelantjong.

Dari Takokak orang teroesken perdjalanan sampe di satoe petjahan, jalah satoe djalanan teroes ka Tjireungas dan jang satoe lagi ka Soekanegara.

Soekanegara ada satoe kota ketjil dingin jang bagoes letaknja dan jang bikin orang inget di Lembang.

Dari Soekanegara ada satoe djalanan ka Kadoepandak dan satoe lagi teroes ka laoet, jalah ka Sindangbarang via Pagelaran.

Dari Kadoepandak poen ada teroesan ka Sindangbarang sebab di Tanggeung djalanan via Kadoepandak dan via Pagelaran saling katemoe lagi.

Waktoe deket sampe di Sindangbarang orang tida liat apa-apa jang loear biasa, tapi tiba-tiba djalanan toeroen setjara kaget dan di bawah orang liat satoe kali bening mengalir dengen djembatan auto kate.

Tingginja ini djembatan tjoema kira-kira satengah meter di atas moeka aer Tjisadea jang di itoe tempat poen sanget tjetek, jalah tjoema kira wates betis kaki.

Tapi waktoe bandjir aer bisa naek sampe lebih dari doea meter tingginja hingga tentoe sadja waktoe demikian itoe djembatan karendem aer sama sekali.

Tjoema tida oesa koeatir, kaloe djembatan auto karendem, orang bisa goenaken praoe njebrang speciaal boeat auto.

BeIon Perna di Java kita liat ”praoe” njebrang jang bisa moeat auto jang begitoe bagoes dan loear biasa sebagi djoestroe di ini tempat sepi dan djarang dipergiken wisatawan.

Sebagi pekakas mengamban (drijvers) digoenaken sematjem buis dari logam model torpedo jang ditjat perak, hingga loear biasa sekali kaliatannja. Tida djaoe dari djembatan Tjisadea orang sampe di pinggir laoet

Di satoe boekit tinggi (duintop) ada terletak pasanggrahan dari Sindangbarang jang rapi dan baroe (kira-kira 1 taon). Dari ini pasanggrahan orang dapet pemandangan djaoe atas laoetan Indische Oecaan jang tida mudah orang loepaken.

Ini pemandangan atas laoetan Lam Hay bikin orang loepaken katjapean perdjalanan dari lebih seratoes KM djaoenja dari Soekaboemi, sebab mata dan hati poeas rasanja. Di laoetan orang liat ombak-ombak jang memoekoel keras berobah djadi boesa (schuim) jang dari djaoe kaliatan sebagi asep poeti dan sebab selaennja pasanggrahan tida kaliatan roemah laen di sakiternja keadahan di sitoe ada boekan maen sepinja. Lapangan terbang Salatri di pinggir laoet masi koerang lebih 30 KM djaoenja dari Sindangbarang.

Di waktoe poelangnja kita sengadja ambil djalan via Koloberes - Tjiwidej - Bandoeng, tapi ini djalanan, teroetama dari Sindangbarang sampe Koloberes masi djaoe dari baek. Koetika kita liwat di tengah djalan ada satoe lobang besar, hingga bebrapa koeli jang sanget kabetoelan ada di itoe oetan sepi moesti tambel doeloe itoe lobang boeroe-boeroe dengen tanah sabelonnja kandaran bisa liwat.

Liwat fabriek besar dari onderneming Koloberes djalanan baroe moelain mendingan; apa jang djoega perloe dikatahoei kaloe ambil ini djalanan memoeter via Koloberes orang koedoe isi tank benzine sapenoenja karena ini djalanan sanget sepi dan tida mudah orang bisa mendapatkan bensin. Djangan kata pomp benzine, manoesia poen dj arang sekali katemoe.

Kaloe orang brangkat dari Soekaboemi ka Sindangbarang dan balik poelang via Koloberes-Tjiwidej-Bandoeng ka Soekaboemi lagi orang letakin satoe driehoek besar dari kira-kira 300 KM dan kita sendiri lakoeken ini dari djam 7 Pagi sampe djam 7 malem dengen tjoema mengaso kira 2 of 3 djam.

Agustus 1940.

(***)